Kuri uyu wa Kabiri tariki ya 27 Werurwe 2018 mu Karere ka Musanze ho mu Ntara y’Amajyaruguru, habereye igikorwa cy’ubukangurambaga bugamije gukangurira abahanzi kwandikisha ibihangano byabo kugira ngo babashe kubibyaza umusaruro bityo umuhanzi abeshweho n’ibihangano bye. Iki gikorwa cyateguwe na MINISPOC ifatanije n’izindi nzego ari zo: RDB, RALC, RSAU, RAC, MINICOM Akarere ka Musanze n’abandi.

Atangiza iki gikorwa, Umuyobozi w’Akarere ka Musanze  wungirije ushinzwe Ubukungu Augustin NDABEREYE yasabye abahanzi bari bacyitabiriye kubyaza umusaruro ibihangano byabo kugira ngo bagire uruhare mu iterambere ry’igihugu agira ati “Twishimiye ubu bukangurambaga kuko bituma abahanzi bamenya uburenganzira bwabo, bakagira uruhare mu iterambere ry’u Rwanda, bahanzi mwandikishe ibihangano byanyu kugira ngo mubibyaze umusaruro mugire uruhare mu iterambere ry’Igihugu”.

Yasabye abahanzi kandi kugira uruhare no kwitabira ibikorwa biteganijwe mu gihe cyo Kwibuka Jenoside yakorewe Abatutsi u Rwanda rugiye kwinjiramo, bakora indirimbo zifasha abanyarwanda kubaka ubunyarwanda.

Muri iki gikorwa MINISPOC yari ihagarariwe na Madamu RUYONZA Arlette, umukozi muri MINISPOC ushinzwe iterambere ry’abahanzi,. Mu ijambo rye yibukije abahanzi batumiwe mu byiciro byabo bitandukanye ko kugira ngo igihangano cy’umuhanzi gishobore gutunga nyiracyo agomba kubanza kuba kimwanditseho nk’umutungo we bwite.

Abahanzi bitabiriye ubukangurambaga basobanuriwe itegeko rirengera Uburenganzira bw’Umuhanzi, ibisabwa kugira ngo igihangano cyandikwe n’ibindi. Bagaragaje ko batari babisobanukiwe ndetse biyemeza gufata ingamba zo kwandikisha ibihangano byabo

Insanganyamatsiko y’ubukangurambaga yagiraga iti “Uburenganzira bw’Umuhanzi, Ishingiro ryo kwigira no Kwiteza Imbere”